काठमाडौं । नेपाली क्रिकेटको इतिहासमा रोहितकुमार पौडेलले नयाँ कीर्तिमान कायम गरेका छन् । उनी लगातार दुई संस्करणको टी-२० विश्वकपमा नेपालको नेतृत्व गर्ने पहिलो क्रिकेटर बनेका हुन् ।
नेपाल प्रिमियर लिग (एनपीएल) मा उत्कृष्ट प्रदर्शन गरेका खेलाडीहरू समेट्दै नेपालले टी–२० विश्वकपका लागि सन्तुलित टोली चयन गरेको छ, जहाँ अलराउन्डरको बाहुल्यता देखिन्छ ।
मैदानभित्र रोहितले देखाएको परिपक्व नेतृत्वकै कारण नेपालले समय–समयमा बलिया टिमविरुद्ध पनि अप्रत्यासित नतिजा निकाल्दै आएको छ । रोहितको नेतृत्वमा टोली थप आत्मविश्वासी देखिएको छ ।
रोहितका साथ अनुभवी अलराउन्डर दीपेन्द्रसिंह ऐरी उपकप्तानको भूमिकामा छन् । फिल्डिङमा चुस्त–दुरुस्त दीपेन्द्र ब्याटिङ र बलिङ दुवैमा प्रभावशाली प्रदर्शन गर्न सक्षम खेलाडी हुन् ।
बलिङतर्फ स्पिन आक्रमणको नेतृत्व सन्दीप लामिछानेले गर्नेछन् । ‘ग्लोबल आइकन’ का रूपमा परिचित सन्दीपलाई लेफ्ट–आर्म स्पिनर ललित राजवंशी, दीपेन्द्रसिंह ऐरी, बसिर अहमेद र शेर मल्लले साथ दिनेछन् । पछिल्लो समय आवश्यक पर्दा कप्तान रोहित पौडेल र ओपनर कुशल भुर्तेलले पनि स्पिन बलिङमार्फत टिमलाई योगदान दिन सक्ने क्षमता विकास गरेका छन् ।
अलराउन्ड क्षमतामा नेपाल बलियो देखिन्छ । दीपेन्द्र, गुल्सन झा, आरिफ सेख र सोमपाल कामीले ब्याटिङ र बलिङ दुवै विभागमा टिमलाई मजबुत बनाएका छन् ।
ब्याटिङतर्फ शीर्षक्रममा कुशल भुर्तेलको आक्रामक शैली छिटो सुरुआत दिलाउन महत्वपूर्ण हुनेछ । विकेटकिपर आसिफ सेखले इनिङलाई स्थिरता दिन्छन् । मध्यक्रममा लोकेश बम आकर्षक सट खेल्ने र इनिङ सम्हाल्ने क्षमताका लागि परिचित छन् । सन्दीप जोरा र नन्दन यादवले शीर्ष ६ बाहिरसम्म ब्याटिङमा गहिराइ थप्नेछन् ।
पेस बलिङको जिम्मेवारी सोमपाल कामी र करण केसीले सम्हाल्नेछन् । नयाँ बलमा स्विङ गराउने र डेथ ओभरमा प्रभावकारी बलिङ गर्ने अनुभव उनीहरूसँग छ । नन्दन यादव र गुल्सन झाले पेस आक्रमणमा विविधता र बेञ्च स्ट्रेन्थ प्रदान गर्नेछन् ।
सन् २०२४ को टी–२० विश्वकपमा नेपाल समूह चरणमै बाहिरिएको थियो । चार खेल खेलेको नेपाल जितविहीन रह्यो ।
प्लेयर्स टु वाच
रोहितकुमार पौडेल (ब्याटर) अलराउन्डरको बाहुल्यता रहेको नेपाली टिमको नेतृत्व रोहितकुमार पौडेलले गरिरहेका छन् । शीर्षक्रममा धैर्यपूर्ण ब्याटिङ गर्ने रोहित आवश्यक पर्दा ठूला प्रहार गर्न पनि सक्षम छन् । बलिङमा समेत योगदान दिन सक्ने उनी सन् २०१९ मा टी–२० अन्तर्राष्ट्रिय क्रिकेटमा डेब्यू गरेका हुन् । हालसम्म ७६ खेल खेल्दै आठ अर्धशतकसहित १,६३७ रन बनाइसकेका रोहित विश्वकपमा नेपालका प्रमुख हेर्नलायक खेलाडीमध्ये एक हुन् ।
सोमपाल कामी नेपाली टिमका सबैभन्दा अनुभवी बलर सोमपाल कामी सन् २०१४ को टी–२० विश्वकपबाट राष्ट्रिय टोलीमा डेब्यू गरेका हुन् । उनी नेपालबाट तीन संस्करणको विश्वकप खेल्ने पहिलो खेलाडीसमेत बनेका छन् । राइट–आर्म मिडियम पेस बलिङ गर्ने सोमपालले ८६ खेलमा ८१ विकेट लिएका छन् । आठभन्दा कम इकोनोमी रेटसहित उनी दबाबको अवस्थामा रन जोड्न पनि सक्षम छन् ।
विश्वकपमा नेपालको यात्रा
नेपालमा राणा शासनकालदेखि नै क्रिकेट खेलिन थालेको दाबी गरिन्छ । सन् १९४६ मा नेपाल क्रिकेट संघ स्थापना भएको थियो ।
नेपालले पहिलो पटक सन् २०१४ को टी–२० विश्वकपमा सहभागिता जनाएको थियो । पारस खड्काको कप्तानीमा खेलेको उक्त विश्वकपमा नेपालले समूह चरणका तीनमध्ये दुई खेल जित्दै अहिलेसम्मकै उत्कृष्ट प्रदर्शन गरेको थियो ।
१६ टिम सहभागी २०२४ को टी–२० विश्वकपमा नेपालले १२औँ स्थान हासिल गर्यो । १० वर्षपछि दोस्रो पटक विश्वकप खेलेको नेपाल उक्त संस्करणमा जितविहीन रह्यो । रोहितकुमार पौडेलको कप्तानीमा नेपाल अहिले तेस्रो पटक विश्वकपमा सहभागी भएको हो । २० टिम सहभागी हालको विश्वकपमा नेपालले १७औँ स्थान प्राप्त गरेको छ ।
विश्वकप इतिहासमा नेपालले हालसम्म नौ खेल खेलेको छ । जसमा दुई जित, सात हार र एक खेल रद्द भएको छ । सन् २०१४ र २०२४ का विश्वकप तथा २०२३ को एसिया कप नेपाली पुरुष क्रिकेट टिमका अहिलेसम्मकै ठूला अन्तर्राष्ट्रिय उपलब्धि मानिन्छन् ।
आइतबार, माघ २५, २०८२
आइतबार, माघ २५, २०८२
