एनपिएल दोस्रो संस्करणमा को-को विदेशी खेलाडी खेल्दैछन् ? (हेरौं विवरण)
बिहिबार, कार्तिक २७, २०८२ |
अपराह्न ३:४२ बजे
काठमाडौँ । सिद्धार्थ बैंक नेपाल प्रिमियर लिग (एनपिएल) को दोस्रो सिजन आगामी मंसिर १ गतेदेखि सुरु हुने भएको छ। आठवटै फ्रेन्चाइज टोलीले तयारी तीव्र पारेका छन् भने विदेशी खेलाडीहरूको आगमनसँगै प्रतियोगिताको रौनक थपिएको छ।
यो सिजनमा अहिलेसम्म १४ देशका ३४ विदेशी खेलाडी नेपाल भित्रिसकेका छन्। फ्रेन्चाइज टोलीले कोटाअनुसार अझ केही विदेशी खेलाडी भित्र्याउने भएकाले यो संख्या बढ्ने अपेक्षा गरिएको छ।
बिज्ञापन
प्रत्येक टोलीमा अधिकतम ६ जना विदेशी खेलाडी रहने व्यवस्था छ, जसमा एक खेलको प्लेइङ–११ मा ४ जना मात्र खेल्न पाउनेछन्।
अहिलेसम्म इंग्ल्यान्डका ७, दक्षिण अफ्रिका र अस्ट्रेलियाका ५–५, अमेरिका (भारतीय र श्रीलंकन मूलका सहित) का ४, नामिबिया, स्कटल्यान्ड र न्युजिल्यान्डका २–२ तथा पाकिस्तान, अफगानिस्तान, वेस्ट इन्डिज, इटाली, नेदरल्यान्ड्स, भारत र युगान्डाका १–१ खेलाडी यस सिजनमा सहभागी हुँदैछन्।
नेपाल आउन लागेका प्रमुख खेलाडीमा दक्षिण अफ्रिकाका फाफ डु प्लेसिस र इमरान ताहिर, न्युजिल्यान्डका मार्टिन गप्टिल र स्कट कुगेलेइन, अस्ट्रेलियाका क्रिस लिन र डार्शी सर्ट, इंग्ल्यान्डका रवी बोपारा र डेभिड मलान लगायत छन्।
नेपाली खेलाडीको पारिश्रमिक २ लाखदेखि २२ लाख रुपैयाँसम्म तोकिएको छ। तर विदेशी खेलाडीहरूको पारिश्रमिक भने न फ्रेन्चाइज टोलीहरूले सार्वजनिक गरेका छन्, न नेपाल क्रिकेट संघ (क्यान) ले चासो देखाएको छ। गत सिजन भारतका शिखर धवनले एक खेलका लागि ४० लाख रुपैयाँमा सम्झौता गरेका थिए।
बुधबार, कार्तिक २६, २०८२
बिहिबार, कार्तिक २७, २०८२
