तेहरान । इरानका सर्वोच्च नेता आयतोल्लाह अली खामेनीको अवस्थालाई लिएर विश्वभर विरोधाभासपूर्ण रिपोर्टहरू सार्वजनिक भइरहेका छन्।
उनको निवासमा भएको आक्रमणपछि ८६ वर्षीय खामेनीको जीवन र स्वास्थ्यका बारेमा विभिन्न अड्कलबाजीहरू सुरु भएका हुन्।
बिज्ञापन
खामेनीको निवासलाई लक्षित गरी गरिएको पहिलो चरणको आक्रमणपछि सार्वजनिक भएका भू-उपग्रह (स्याटेलाइट) तस्बिरहरूले उनको परिसरमा ठूलो क्षति भएको देखाएका छन्। आक्रमणको सुरुवाती समयमा इरानी अधिकारीहरूले उनलाई सुरक्षित स्थानमा लगिएको बताएका थिए। केही समयपछि उनले सरकारी टेलिभिजनमार्फत सम्बोधन गर्ने समाचार आए पनि अन्तिममा कुनै सम्बोधन हुन सकेन।
यसै सन्दर्भमा इजरायली प्रधानमन्त्री बेन्जामिन नेतान्याहुले टेलिभिजनमार्फत देशवासीलाई सम्बोधन गर्दै सर्वोच्च नेता खामेनी मृत्यु भएको संकेत गरेका थिए। यद्यपि, उनले खामेनीको मृत्यु नै भएको भनेर स्पष्ट शब्दमा भनेका छैनन्।
तर, अमेरिकी र इजरायली सञ्चारमाध्यमहरूले नाम नखुलाइएका अधिकारीहरूलाई उद्धृत गर्दै खामेनीको मृत्यु भइसकेको दाबीका साथ समाचार सम्प्रेषण गरिरहेका छन्।
अर्कोतर्फ, इरानी अधिकारीहरूले भने यी खबरहरूको लगातार खण्डन गरिरहेका छन्। इरानी सरकारी टेलिभिजनका एक प्रस्तोताले खामेनीको नाम उल्लेख नगरी जनतालाई शत्रुको मनोवैज्ञानिक प्रचारको भ्रममा नपर्न आग्रह गरेका छन्।
यसैबीच, अमेरिकी राष्ट्रपति डोनाल्ड ट्रम्पको सामाजिक सञ्चालको पोस्टले पनि यो विषयलाई थप चर्चामा ल्याएको छ।
हाल इरानको ‘एसेम्ब्ली अफ एक्सपर्ट्स’ (विज्ञहरूको सभा) नयाँ सर्वोच्च नेता चयनका लागि गोप्य छलफल वा तयारीमा जुटिरहेको हुन सक्ने अनुमानb गरिएको छ।
यदि खामेनीको मृत्युको आधिकारिक पुष्टि भएमा, यो इस्लामिक गणतन्त्र इरानको इतिहास र इजरायल तथा अमेरिकासँगको यसको शत्रुतापूर्ण सम्बन्धका लागि एक अत्यन्तै संवेदनशील र निर्णायक मोड सावित हुने बीबसीले समाचारमा उल्लेख गरेको छ ।
बुधबार, बैशाख ०२, २०८३
बिहिबार, बैशाख ०३, २०८३
