विराटनगर । फिफा विश्वकप २०२६ अब निर्णायक मोडमा पुगेको छ । उपाधिबाट दुई जित मात्र टाढा रहेका फ्रान्स र स्पेन मंगलबार पहिलो सेमिफाइनलमा आमनेसामने हुँदैछन् ।
विश्व फुटबलका शीर्ष राष्ट्रहरूबीचको यस भिडन्तलाई ‘फाइनल अघिको फाइनल’ को रूपमा हेरिएको छ, जहाँ लगातार तेस्रोपटक फाइनल पुग्ने लक्ष्य बोकेको फ्रान्स र १६ वर्षपछि उपाधि चुम्ने अभियानमा रहेको स्पेन भिड्नेछन् ।
बिज्ञापन
कप्तान किलियन एमबाप्पेको नेतृत्वमा रहेको फ्रान्स प्रतियोगिताकै सबैभन्दा खतरनाक आक्रमण गर्ने टोलीका रूपमा देखिएको छ, जहाँ ओस्मान डेम्बेले, माइकल ओलिसे र डिजिरे डुएले विपक्षी रक्षापङ्क्तिमाथि निरन्तर दबाब बनाउँदै आएका छन् ।
आठ गोलसहित गोल्डेन बुटको दौडमा लियोनल मेसीसँगै शीर्ष स्थानमा रहेका एमबाप्पेलाई रोक्नु स्पेनका लागि मुख्य चुनौती हुनेछ । अर्कातर्फ, बल नियन्त्रणमा आधारित परम्परागत शैलीलाई अझ प्रभावकारी बनाएको स्पेन रोड्री र पेड्रीको मिडफिल्ड नियन्त्रण, लामिन यामालको व्यक्तिगत कौशल र मिकेल ओयारजाबालको फिनिसिङको बलमा खेल आफ्नो पक्षमा पार्ने दाउमा छ ।
ऐतिहासिक रूपमा यी दुई टोलीबीच ३८ पटक प्रतिस्पर्धा हुँदा स्पेनले १८ र फ्रान्सले १३ खेल जितेका छन् भने ७ खेल बराबरीमा सकिएका छन् । विश्वकपमा भने यिनीहरू सन् २००६ को अन्तिम १६ पछि दोस्रोपटक मात्र भिड्न लागेका हुन्, जसमा फ्रान्स ३–१ ले विजयी भएको थियो ।
तर, पछिल्लो ठूलो प्रतियोगिता युरोकप २०२४ को सेमिफाइनलमा भने स्पेनले फ्रान्सलाई २–१ ले पराजित गरेको थियो । यस महत्त्वपूर्ण खेलअघि दुवै टोलीमा चोट वा निलम्बनको समस्या नभएकाले पूर्ण क्षमताका साथ मैदान उत्रिनेछन्, जसमा फ्रान्सले जर्मनी र ब्राजिलपछि लगातार तीन विश्वकप फाइनल खेल्ने कीर्तिमान पछ्याउनेछ भने स्पेनले सन् २०१० पछिको पहिलो फाइनल यात्रा तय गर्न खोज्नेछ ।
सोमबार, असार २९, २०८३
मंगलबार, असार ३०, २०८३
