विराटनगर। झापा क्षेत्र नम्बर ५ यतिबेला देशकै चासोको केन्द्र बनेको छ। बालेन्द्र शाह (बालेन) र नेकपा एमाले अध्यक्ष केपी ओलीबीच चुनावी प्रतिस्पर्धा हुने भएपछि यस क्षेत्रको राजनीतिक माहोल तातेको हो।

चुनावी प्रचार-प्रसार तीव्र बन्दै जाँदा बालेनको समर्थनमा एमाले र कांग्रेसका नेता–कार्यकर्ताहरू खुला रूपमा उभिन थालेका छन्। पार्टी परित्याग गरेर ‘बालेन जिताउ अभियान’मा सहभागी हुनेहरूको संख्या दिनप्रतिदिन बढिरहेको छ।

बिज्ञापन

केहीले सामाजिक सञ्जालमार्फत राजीनामा घोषणा गरेका छन्

यो पनि पढ्नुहोस

• कांग्रेस रुपान्तरित भएकाले झापा ५ मा जित्ने नेताहरुको दाबी

• विराटनगरमा एकछिन बसेर काठमाडौँ फर्किए बालेन

• नेपालगञ्ज पुगेका बालेनलाई भव्य स्वागत

कांग्रेसका प्रकाश प्रसाई र एमालेका सन्तोष दुलालसहित विभिन्न युवा नेताहरूले पार्टी छाडेर बालेनलाई साथ दिएका छन्। केहीले बालेनसँग तस्बिर सार्वजनिक गर्दै समर्थन जनाएका छन् भने केहीले सामाजिक सञ्जालमार्फत राजीनामा घोषणा गरेका छन्। उनीहरूले परिवर्तनको पक्षमा उभिएको दाबी गरेका छन्।

एमालेका युवा नेता दुलाल बालेनलाई झापा-५ मा उम्मेदवार बनाउन सक्रिय रहेको बताइन्छ। माघ ६ गते मनोनयन दर्ताकै दिन दमक नगर कांग्रेस सभापति प्रकाश प्रसाईले पार्टी परित्याग गरे। उनी बालेनसँगै निर्वाचन कार्यालय पुगेर उम्मेदवारी दर्ता कार्यक्रममा सहभागी भएका थिए।

तीन कार्यकाल दमक उद्योग वाणिज्य संघको नेतृत्व गरिसकेका प्रसाईले “परिवर्तनलाई साथ दिन यो निर्णय लिएको” बताएका छन्। उनकी पत्नी रेगिना भट्टराई प्रसाई दमक नगरपालिकाकी निर्वाचित उपमेयर हुन्।

यस्तै, कांग्रेसका कमल गाउँपालिका सचिव महेन्द्र बुढाथोकी, क्षेत्रीय समिति सदस्य तथा मारवाडी सेवा समिति दमकका पूर्वअध्यक्ष दिनेश अग्रवाल, व्यवसायी सोम खनाल र जिल्ला सदस्य तथा बिर्तामोड उद्योग वाणिज्य संघका पूर्वअध्यक्ष बलराम कार्कीले पनि पार्टी छाडेर राष्ट्रिय स्वतन्त्र पार्टीतर्फ लागेका छन्।

एमालेबाट समेत उल्लेख्य संख्यामा नेता-कार्यकर्ता बाहिरिएका छन्। २०५७ सालदेखि पार्टीका विभिन्न तहमा सक्रिय राजेश प्रसाई र जिल्ला सदस्य योगेश उप्रेतीले पार्टी परित्याग गरेका छन्। क्षेत्रीय उप–सचिव महेन्द्र खड्का, दमक नगर सदस्य चन्द्र थापा, युवा नेता महेश घिमिरे र अर्जुन मैनाली पनि रास्वपामा सक्रिय बनेका छन्।

एमाले युवा संघ दमकका अध्यक्ष छवि खतिवडा, उपाध्यक्ष विजय तामाङ र सचिव कमल गैरेले सामूहिक राजीनामा दिएका थिए। पछि सचिव गैरेले राजीनामा फिर्ता लिएपछि अध्यक्ष ओलीले दमकमा नयाँ नेतृत्वलाई शपथ गराएका थिए। त्यस्तै, नेपाली कम्युनिष्ट पार्टीका युवा नेता डेभिड शाहीले पनि पार्टी परित्याग गरी बालेनलाई साथ दिएका छन्।

रास्वपाका क्षेत्रीय सभापति भेषराज भट्टराईका अनुसार झापा-५ मा बालेनको समर्थनमा कांग्रेस र एमालेका नेता–कार्यकर्ताहरू खुला रूपमा आउने क्रम अझै बढिरहेको छ।