भारत–पाकिस्तानबीचको टकरावको प्रभाव नेपाल–भारत सीमावर्ती क्षेत्रमा परेको छ ।
भारतले पाकिस्तानको सीमावर्ती क्षेत्रमा मिसाइल आक्रमण गरेपछि भारतसँगको नेपाली सीमा क्षेत्रमा आवतजावतमा कडाइ गरिएको छ । सप्तरीको गोबरगाढादेखि पश्चिममा पर्साको ठोरीसम्म ४ सय ६४ किलोमिटर मधेश प्रदेशको सीमा भारतको बिहार राज्यसँग जोडिएको छ ।
नेपाल–भारतको खुला सिमानाका कारण दुवै देशका नागरिक सहज रूपमा आवतजावत गर्थे । तर, २२ अप्रिलमा भारतको काश्मिरको पहलगाममा भएको आतंककारी घटनापछि भारत–पाकिस्तानबीच तनाव बढेपछि नेपाल–भारतको सीमावर्ती क्षेत्रमा कडाइ गरिएको छ । धनुषाको जटही, जयनगर, महोत्तरीको भिठामोड, सम्सी, सर्लाहीको सोनवर्षा र पर्साको रक्सौलसहितका नाकामा उच्च सुरक्षा सतर्कता अपनाइएको छ । यी नाकामा दुवै देशका सुरक्षाकर्मीहरू तैनाथ गरिएका छन् ।
सीमा क्षेत्रमा सामान्यतया बिनाकुनै रोकतोक नागरिकहरू आवतजावत गर्ने व्यवस्था थियो । दैनिक रूपमा सयौँ नेपाली र भारतीय नागरिक सामान खरिद, स्वास्थ्य उपचार, रोजगार वा आफन्त भेट्न सीमा पार गर्थे । तर, पछिल्लो भारत–पाकिस्तानबीचको टकरावका कारण नेपाल–भारत सीमा क्षेत्रलाई संवेदनशील मानेर प्रत्येक व्यक्तिको परिचय र गन्तव्यबारे सोधपुछ गरेर मात्र आवतजावतको अनुमति दिन थालिएको छ ।
भिठामोड सीमा क्षेत्रमा खटिएका एक सुरक्षाकर्मीले भने, ‘हामीले सुरक्षा सतर्कता बढाएका छौँ । भारत–पाकिस्तानबीचको तनावले हाम्रो देशमा प्रत्यक्ष असर नपरे पनि सीमा क्षेत्र संवेदनशील हुने भएकाले हामी कुनै पनि जोखिम लिन सक्दैनौँ ।’ उनका अनुसार विशेष गरी नयाँ अनुहार र शंकास्पद गतिविधि भएका व्यक्तिमाथि विशेष निगरानी बढाइएको छ ।
जटहीमा नाकामा व्यवसाय गरिरहेका एक व्यापारीका अनुसार अहिले सीमामा कडाइ भएपछि सीमावर्ती भारतीय बजारमा सामान खरिद गर्ने नेपालीहरूको संख्या पातलिएको छ ।
*** समाप्त ***
बुधबार, जेठ ०७, २०८२
