काठमाडौं । अर्जेन्टिनाका कप्तान तथा विश्व फुटबलका महान् खेलाडी लियोनल मेसीले अन्तर्राष्ट्रिय फुटबलबाट भावुक बिदाइ लिएका छन्। आफ्नो अन्तिम अन्तर्राष्ट्रिय खेलमा मेसीले एक गोल र दुई असिस्ट गर्दै अर्जेन्टिनालाई बेनिनमाथि ३–० को सहज जित दिलाए।
ब्युनस आयर्सस्थित मोनुमेन्टल स्टेडियममा ८५ हजारभन्दा बढी दर्शकको उपस्थितिमा ३९ वर्षीय मेसीले २१ वर्ष लामो अन्तर्राष्ट्रिय करियरको अन्तिम खेल खेले। अर्जेन्टिनाका लागि यो उनको २०८औँ अन्तर्राष्ट्रिय खेल थियो।
विज्ञापन
खेलको १०औँ मिनेटमा मेसीको प्रसिद्ध १० नम्बरको जर्सीको सम्मानमा एक मिनेट ताली बजाइएको थियो। उक्त क्षणमा मेसी भावुक देखिएका थिए।
खेलमा अर्जेन्टिनाका भेट्रान डिफेन्डर निकोलस ओटामेन्डीले पहिलो गोल गरे, जसमा मेसीले असिस्ट गरेका थिए। त्यसपछि निको पाजले दोस्रो गोल थपे। मेसीले ७१औँ मिनेटमा पेनाल्टीमार्फत गोल गर्दै आफ्नो अन्तर्राष्ट्रिय गोल संख्या १२६ पुर्याए।
मेसीको अन्तिम अन्तर्राष्ट्रिय खेललाई अर्जेन्टिनामा ‘द लास्ट ट्याङ्गो’ नाम दिइएको थियो। खेलअघि नै उनी भावुक बनेका थिए। समर्थकहरूले भरिएको सडक हुँदै अर्जेन्टिनी टोलीको बस अघि बढ्दा मेसीले आँसु पुछिरहेको दृश्य देखिएको थियो।
मैदान प्रवेश गर्दा मेसी आफ्ना तीन सन्तानसँगै थिए। उनकी पत्नी एन्टोनेला रोकुज्जो र आमा सेलिया कुक्चिटिनीले भीआईपी बक्सबाट उनलाई हात हल्लाउँदै बिदाइ गरेका थिए।
खेल सुरु हुनुअघि मैदानमा मेसीको १० नम्बरको जर्सीसहित ‘धन्यवाद’ लेखिएको विशाल अर्जेन्टिनी जर्सी प्रदर्शन गरिएको थियो। त्यसपछि हजारौँ समर्थकले मेसीको सम्मानमा नाराबाजी गर्दै स्टेडियम गुञ्जाएका थिए।
फकल्यान्ड युद्धका पूर्वसैनिक फाबियो सान्तानाले राष्ट्रिय गान प्रस्तुत गर्दा मेसी पुनः भावुक बने। सो क्रममा ‘द माल्भिनास आर अर्जेन्टाइन’ लेखिएको ब्यानरसमेत प्रदर्शन गरिएको थियो।
खेल सकिएपछि स्टेडियममाथि विशेष ड्रोन शो आयोजना गरिएको थियो। ड्रोनमार्फत आकाशमा मेसीको आकृति बनाउँदै आठपटकका बालोन डी’ओर विजेतालाई उनको अतुलनीय करियरका लागि धन्यवाद दिइएको थियो।
‘मैले आफ्नो सबै दिएँ, अब मसँग केही बाँकी छैन’
मेसीको अन्तर्राष्ट्रिय बिदाइ अर्जेन्टिनाले स्पेनसँग विश्वकप फाइनलमा १–० को हार बेहोरेको करिब साढे दुई महिनापछि भएको हो। अमेरिकाको न्यु जर्सीमा भएको उक्त खेलपछि मेसी आँसु झार्दै मैदानबाट बाहिरिएका थिए।
त्यसपछि उनले अर्जेन्टिनाका लागि आफूले सक्दो सबै दिएको बताएका थिए।
‘मैले आफ्नो सबै दिएँ । अब दिनका लागि मसँग केही बाँकी छैन । साथै, उत्कृष्ट युवा खेलाडीहरू आइरहेका छन् । उनीहरूले आफ्नो अवसर पाउनुपर्छ,’ उनले त्यसबेला भनेका थिए।
अन्तिम खेलअघि ब्युनस आयर्स विश्वविद्यालयले अर्जेन्टिना फुटबल संघ (एएफए) को मुख्यालयमा आयोजना गरेको समारोहमा मेसीलाई मानार्थ डक्टरेट उपाधि प्रदान गरिएको थियो। सम्मान ग्रहण गरेपछि उनले ‘म मानार्थ डाक्टर हुँ भनेर भन्न पाउनु !’ भन्दै ठट्टासमेत गरेका थिए।
एएफए मुख्यालयबाहिर समर्थकहरूले मेसीको तस्बिरसहितको विशाल अर्जेन्टिनी झण्डा प्रदर्शन गरेका थिए। झण्डामा ‘द जोय अफ माइ लाइफ’ अर्थात् ‘मेरो जीवनको खुसी’ लेखिएको थियो।
मेसीले अर्जेन्टिनालाई २०२२ को विश्वकप जिताउँदै ३६ वर्षपछि देशलाई विश्वकप उपाधि दिलाएका थिए। त्यससँगै उनी अर्जेन्टिनाका महान् फुटबलर डिएगो म्याराडोनाका उत्तराधिकारीका रूपमा स्थापित भएका थिए।
उनको अन्तर्राष्ट्रिय करियरमा अर्जेन्टिनाले एकपटक विश्वकप जितेको छ भने २०१४ र २०२६ मा उपविजेता बनेको छ। त्यस्तै, अर्जेन्टिनाले २०२१ र २०२४ मा कोपा अमेरिका उपाधि जितेको थियो।
मेसी हाल अमेरिकी क्लब इन्टर मियामीसँग २०२८ सम्मको सम्झौतामा छन्। यद्यपि, उनका पिता जर्ज मेसीको दुई महिनाअघि निधन भएपछि उनले व्यावसायिक फुटबलबाट समेत अपेक्षाभन्दा चाँडै बिदा लिन सक्ने संकेत गरेका छन्।
बुधबार, असोज २१, २०८३
बुधबार, असोज २१, २०८३
